في حملة منظمة ضد القوات المسلحة السودانية متمثلة في ضرب قائد الجيش الفريق أول ركن عبدالفتاح البرهان

🟢كتبه / منصور الهادي..

🟢صراحة..
في حملة منظمة ضد القوات المسلحة السودانية متمثلة في ضرب قائد الجيش الفريق أول ركن عبدالفتاح البرهان..

🟢يا خينا انت مشكلتك مع البرهان؟!..

ااااااااااااي…

🟢لكن البرهان هو قائد الجيش والجيش هو من يخوض معركة الكرامة الوجودية نيابة عن الشعب السوداني والهجوم على البرهان الان يعني هزيمة معنوية للقوات المسلحة ومصلحة تصب في صالح المليشيا المتمردة …

حملة..
اشتعلت فجأة كدا وجاءت متزامنة مع إغلاق صفحات المليشيا على مواقع التواصل الاجتماعي..

الحملة..
تتحدث في مضمونها عن إخفاق يقولون انه صاحب البرهان في إدارته لمعركة هي الآن في خواتيمها وتمضي في تحقيق أهدافها بثبات وثقة ودقة استطاعت فيها الحفاظ على البنية التحتية للعاصمة القومية ورغم تحصن جنود المليشيا بها ..

المدعو عمسيب يقود الفتنة ويشعل ناااارها…

الطاهر التوم مفروض يجي من تركيا ويقود معركة الخرطوم بنفسه مادام يملك كل هذه الفكرة العسكرية النيرة….

سألنا..
المنتقدين ماهو الخطأ العسكري والتكتيكي الذي وقع فيه البرهان في أدارة معركة الخرطوم؟!..
ولم نجد منهم أي إجابة..

يقولوا ليك برهان مفروض يفك اللجام ويطلق سراح الجيش..!!!
تقول ليهم وين الجيش المقيدو برهان وياتو سلاح لم يستخدمه برهان في معركة الخرطوم؟!
وكالعادة لن تجد إجابة…..

تسالهم هل من يقود المعركة الان هو البرهان منفرد اما قيادة متخصصة من رجالات القوات المسلحة والقرار يصدر مشترك؟!
كالعادة لا إجابة…

طيب انتو كلمتوا الشعب وجنود وقيادات القوات المسلحة التي تحارب نيابة عنكم في الميدان انو برهان كعب ولايصلح؟!…
عايزين نفهم كلمتونا عشان نعمل شنو بالضبط؟!
هل المطلوب مننا كشعب نخرج في ثورة ضد البرهان..؟!
ولأ المطلوب من الجنود يتمردوا على البرهان؟!
ولأ مطلوب من قيادات الجيش ينقلبوا على البرهان؟!

كلمتونا لشنو يا عمسيب والطاهر التوم…؟!..
ماهو المطلوب
وماهو الإصلاح العايزنو يتم..؟!

حسب كلامكم عندكم برهان مانافع يعني نفهم من كلامكم دا برهان غير مقصود بالنصيحة ولكن آخرين مطلوب منهم يقوموا بشي ما باسم الإصلاح …
إذن..
عايزين يحصل شنو؟!..
الحل شنو في رايكم في ظل المعركة الشرسة التي تدور الآن…
هل الناس تقعد في ظلال شككم الذي فرضتوه على أرض المعركة وتتقهقر القوة العسكرية بسبب السوء المعنوي ولأ فهمكم شنو بالضبط؟!…

في حرب دائرة الان وانتو فتحت باب شر في وقت غير مناسب…

البرهان لو عطس يقولوا ليك عطس (بالعطاء) ومفروض يعطس (بالخاء) …

عمسيب مشتح في مكيفات دبي وضاربو الهواء البارد قال ايه : مفروض برهان يضرب الكبااااري ويقطع الدرب على المليشيا…
طيب برضو ما حايقطع تحرك الجيش بين المدن الثلاث..!!

يقولوا ليك ليه الجيش ما ضرب مصفى الجيلي مافيهو دعامة ..؟ !!
يازول انت عاقل..؟!
انت تصيح..؟!
مصفى الجيلي دا بالضبط زي مفاعل زابروجيا في أوكرانيا ضربه يعني كارثة بئية وإنسانية وأخلاقية ووطنية ..

عمسيب يقول ليك وين المستنفريين..؟!
يازول وين انت ذاتك؟!
ماجيت الاستنفار مالك؟!
ماعندك حق التذكرة
ولأ ما بالغ..؟!!
الاستنفار ليك انت برضو فلماذا لم تلبي النداء وتغادر مكيفات دبي..؟!

بعدين لعلمك مستنفر ما عندو نمرة عسكرية لن يتم الزج به في معركة الخرطوم وسيتم توزيعهم في حماية ولايتهم ..
لو الجيش عايز ناس تضرب نااار وخلااااص كان أولى بهذه المهمة الشرطة السودانية..لكن الجيش حيد وابعد الشرطة لأنها ليست ذات مهام قتالية فكيف يدفع بمواطنين لم يتجاوز تدريبهم شهرين..
نعم سيتم الاستفادة من المستنفرين في المعركة بتأمين ظهر الجيش لاتاحة الفرصة له بالتقدم للإمام بأريحية..

والله شي غريب..
هجوم على قيادة الجيش في وقت مفصلي..

ماممكن تاجلوا معركتكم دي يومين تلاتة.؟!..

برهان في خطاب عيد الجيش بنفسه قال نعم هناك أخطاء قبل يوم ١٥ أبريل ولن تتكررر..
تاني لافي إطاري..
لا دعم سريع…
قال اي غلطنا سياسيا
لكن عسكريا دي وين يا عمسيب؟!

  نسأل الله السلامة 

*( منصور الهادي)*