مولانا السيد محمد عثمان حسم الأمر

محمد حامد جمعة نوار يكتب

مرة عندنا عزابة . أيام الدنيا هدية ورضية . وقالو الليلة نتابع برنامج طبخ في التلفزيون نظبط وجبة حديثة . فترو من القطر القام . والفول البعركو بقزازة البيبسي وبحلبو فيه زيت سمسم داك . المهم واحد طلع زبط الاريل والتانين حرسو الشيف . جيب الزيت . اردم البصل . جنزبيل لو ماف كب شطة حمراء . واحد بلتقط المقادير والباقيين ببركتو في المطبخ .

قام واحد شليق دور شريط لبوب مارلي بصوت عال في الاوضة الملاصقة لجارهم . زول مولانا جنو وجن (بوب) والإزعاج هو المالك للبيت العزابة المستأجر . وتأمين العداد في بيته ! النوع القديم الاسود ابو صباع داك . عمك إستاء وفي ذروة دخول الوصفة مرحلة الخلط قبل النهائي . نممممم قطع الكهرباء ! التلفزيون جلبغ إنطفأ ! الجماعة أخدو ليهم صنة نص دقيقة ! في الضلام ! واحد طلع الحوش لاحظ الجيران منورين . جاهم راجع قال ليهم مولانا قطع الكهرباء ! قوم يا حميدة أمش دكان العربي جازف الفولة . لو لقيت . ووقف البقية ما عارفين الخلطة يتمسحو بيها ولا يطعمو بيها الفول 😂😂😂