ومرة تغلبني القراية …!

بقلم/صبري محمد علي (العيكورة)

خاص ب {خبطة نيوز}
ظللت طيلة الثلاثة ايام الماضية ممسكاً عن الكتابة
أستمتع وإن شئت فقل (أعُضُ اصابعي) من بعض كثير من
شفقة
و الشلاقة الكتلت إشراقة
والكتابة بلا مكابح
والنشر بلا حدود و تروي للاخبار

وأشك ان …..
بعضهم يقرا من اساسه
فقط من العنوان
(وشوت يا جكسا) حتى تحولت الكثير من (قروبات) الواتس الي غُرف عمليات
(ياخ جنس تنظير لكن) !
الشعب السوداني كله و من متابعته لاحداث نيالا و زالنجي والجنينة
(بقدرة قادر)
تحول الي وزراء دفاع
وخبراء عسكريون !
ومنظراتية
يرسمون للجيش كيف يتحرك
ومتى وما ينبغي عليه ان يفعل ! و ….و ….

فماذا كنتم تتوقعون ؟
إنها الحرب
الحرب يا سادتي فر وكر وهزيمة ونصر وتغيير خطط وتقدم وتراجع وتموضع وإنسحاب

يعني الحكاية ما …
(باسطة باللبن) طوااالي
فهونوا على انفسكم يا هؤلاء
ليس هناك جيش في العالم سيجعل من اسراره العسكرية
وخطته مِلكاً مُشاعاً لكل من
(هب و دب)
بل حتى العساكر ليس من حقهم ذلك إلا بالقدر الذي تراه القيادة

في المقابل …..
(الميديا) الداعمة للتمرد انتهزتها سانحة
ماااا الشعب كله بقى منظراتية وكده !
فبداوا يشغلون الشعب عن دعم الجيش (بالبوستات) مقاس
(ستة بوصة)

قول لي كيفن يا أستاذ؟
اقول ليك انا يا صاحبي
وانت مشغوول تلهث من (قروب) ل(قروب) لافح شبشبك وعامل فيها (عبد البارئ عطوان)
ومتاوقة بي جاي
ومش عارف
(الجديد شنو)

يطلع ليك خبر كده (براااحة)
يقول ليك ….
(عااااجل)
تسريبات حصرية من منبر (جدة) تقووم إنت يالمبروك تفك الفي يدك وتجري وراهو

(شويتين) كده …
و يطلع ليك خبر
(الهادي ادريس) بتاع المجلس السيادي يقول ليك انه غير معني بقرارات البرهان الاخيرة

و ما أن تنتهي من (القراية) …
إلا و يطلع ليك واحد (لافي عٌمتو) يقول ليك
عزت قال وقال
ومناع ….
(يقوقي بي غادي)

وبتاع الثروة الحيوانية برضو قال زعلان و سيظل وزير
(في نفس البرهان)
وغيرها من الاخبار التي لا وزن لها

المُهم خُلاصة الامر ان الهدف هو ….
تشتيت الجهود عن مناصرة القوات المسلحة
و إشاعة المزيد من الشائعات التي لا اول لها ولا آخر

قبل فترة كتبت مقالاً ….
نصحت فيه اولادنا
(الوتسابة)
و (الفسباكة)
ان يكافحوا الإشاعة بزيت السمسم (اااي) ياهوو المسوح العادي ده
الاشاعة دي ما زي الباعوضة بتقرصك إذا فتحت ليها تدخل
واذا تجاهلتها بتاخد (نونايتا) وبتفوت تشوف غيرك (راسو خفيف)

(فاااا) …..
اتركوا الجيش يشوف شغله واعينوه بالصمت والدعاء
لكن ياخ حكاية
عااااجل
و هاااام
فهذه لن توصلك الي الحقيقة !
فما تقطعوا شباشب الناس ساكت ياجماعة

السودان في هذا الظرف…..
في اشد الحاجة لتضافر الجهود المدنية الداعمة للجيش ولآلة إعلامية واعية ومواكبة ومتجردة من الاغراض إلا حب هذا الوطن
وفي حاجة أيضا لمُتلقي
حصيف
و واعٍ
وليس للرداحين
وللبكائين
و للمنظراتية

صدقوني …..
إن منهم من لا يفرق بين (القرنوف) و(الدوشكا) و(الكلاش)
وتراهم في كل وادٍ يهيمون
(ومعاها كفكفة اكمام الجلابية) كمان !

ياخ اليومين الفاتو …
والله الواحد بقى مطرب عديل
مرة اسرح …
ومرة افرح …
ومرة تغلبني القراية ….
من جنس الطلس اللافي وكمية القطيع المخموم
سبحان الله
ومن (مجاميعو)

ياعالم إطمئنوا …..
الحزام الغربي للسودان إبتداءاً من ليبيا وتونس مرورا بتشاد وافريقيا الوسطي وناس (سلفا)
ومش عارف
ناس (سونا) الحبشية بتاعت الجبنة
(شفتا كيف)
وإمكن لغاية ناس مسعود اليماني الصياد في البحر الاحمر
وتعال معاي …
لغاااية بورتسودان وشمالها الكلام ده كلو داخل فلاشة و شاشة
في غرفة ما بالخرطوم !

وأظن لستُ في حاجة ان اشرح نظرية (المكاوشة)
التي يبدو واضحاً ان الجيش ينتهجها حاليا في غرب السودان .