يا البرهان … ما قالوا ماشي ليك لعقد ياخ !
بقلم /صبري محمد علي (العيكورة)
خاص ب [الانتباهة]كلام (الزاكياب) اليوم للفريق البرهان (اصصلا) لم يكن يتوقعة القحاطة ! انا غايتو شخصيا لم أتفاجأ . بعرف ليك الزول دة مننن يلف عمتو ويقولوا ليك ماشي لعقد واللا (مش عارف) زواج جماعي ! بعرفوا ليك عاوز يقول الكلام (الماياهو داك) …
يا سعادتو …
ده كلام شنو ياخ الجماعة الغسلوا وكوا هديماتهم للتوقيع وما خلوا حلاق وميكياج وحفرة دخان وحنانة و كمان جابت ليها هتاف بلا خجلة (فولكر … فو لكر ) داخل قاعة الصداقة !
يعملوا شنو يعني ؟
تجي ياخ تبوظ الموضوع كلو كلو؟
و الحكاية جابت ليها دمج ودعم وحركات ومافى زول بخوف الجيش ومش عارف الكلام البسيح الركب داك !
يعني مااا كان ممكن يتأجل الكلام ده شوية ياخ ؟
يعني اصصلا يا سعادتك …
مالقيت غير الخميس ده تورم فشفاش الناس ديل ؟ ياخ على الاقل كان تخليهم يخمسوا مع اسرهم والصباح رباح …
لكن والله يا سعادتو بيني وبينك …
لو تجيني على رأيي اصلا البلد ما محتاجا لا إتفاق إطاري و لا اتفاق سياسي !
ياخ البلد دي ما ياها دي ماشة زي الساعة البموت بدفنوه والداير يعرس بعرس والبتخمج بجضموه
و (اهوو) …
الولاة المكلفين بسم الله ماشاء الله ناس احمد عثمان حمزة وغيرو شغالين للساعة تلاتة صباحا لافين فى حملة النضافة و الجهات الامنية كمان (عيني باردة) الارتكازات الماخمج
(لا) وكمان لو شفت ناس مكافحة المخدرات شغالين ليل نهار
واطراف سلام (جوبا) طياراتهم ما وقفت نيالا وجوبا والجنينة … و(الخال) داك كمان كلام تاني (غايتو ما مقصر) البخربها الليلة بعدلها بكرة ! والحمد لله (امورنا طيبي) .
فيا سعادتو …
مش مصلحة الوطن البتنادي بيها دي ؟
كللل القرائن والشواهد والادلة بتقول يبقى الجيش بس .
اذا اردتم ان تهزموا الاستهداف الخارجي وعملائه
فأصبر شوية فالبلد قرربت تعبر !
وياااا زمن وقف شوية .. .
الخميس ١٦/فبراير ٢٠٢٣م
