“الجردقة” .. الترماي .. التسوية : ذكاء البائع .. غباء المشتري

حكاية وكسرتين

شندقاوي يكتب

الحكاية يا أخونا دلاي تحتاج منك لي وقفة تأمل … سمعتها من أبوي …
قال لي يا ابوصلاح في الخمسينات من القرن الماضي قال ليك واحد إسمو عم حسين ضربتو فلسه من أمها … إتلفت يمين شمال ما لقي حاجة في البيت يبيعها غير شوال جردقة (عمو جاهم زيارة وجاب ليهم شوال الجردقة دا هدية.. وطبعاً زي ما عارف ناس الأقاليم ما بجو لي زولهم الفي المدينة ايدينهم فاضية.. فعم اخونا حسين دا شكلو حتي هو كانت ضارباهو فلسة شال شوال الجردقة وجابو معاهو هدية لي ود اخوهو في حي العرب)… أها صاحبنا حسين  عارف انو شوال الجردقة دا زول بشتريهو منو مافي .. ومافي زول زاتو في البنادر ممكن يعرف الجردقة دي شنو اصلا 😁😁😁 فشنو فكر في فكرة… كورك لي واحد من اولاد الحلة اداهو تعريفة قال ليهو امشي دكان اليماني داك قول ليهو اديني جردقه بتعريفة.. (طبعا حسين عارف مسبقا انو دكان اليماني ما بتتلقي فيهو جردقة) .. الولد مشى وجاء راجع قال ليهو اليماني قال ما عندو جردقة … حسين خلي الولد مشى وكورك لي ولد تاني وبرضو رسلو لنفس دكان اليماني وقال ليهو امشي جيب لي منو جردقة .. برضو الولد التاني مشى وجاء قال ما لقي جردقة في دكان اليماني… حسين بقي كل نص ساعة ينادي  ولد جديد يديهو التعريفة ويقول ليهو امشي جيب لي جردقة من دكان اليماني… العصر كدا حسين يمكن يكون رسل 20 ولد لدكان اليماني عشان يجيبو ليهو جردقة .. وكلهم طبعا جوهو قالو ليهو ما لقينا جردقة …. المغرب عمك حسين لفه عمتو ومشى لليماني قال ليهو عندي شوال جردقة يا مصلح تشتريهو؟! 😳😳 مصلح  اليماني ما صدق قال ليهو ايوه بشتريها (ما شاف النهار كلو الناس بتسأل عنها) عمك حسين مشي جاب شوال الجردقة رماهو قدام باب الدكان واستلم 5 جنيه وبقي مارق .. 😁😁 طلاق تلاتة قال ليك اليماني لمن رجع اليمن شوال الجردقة مصرور في صرتو زول تاني جاهو قال ليهو عايز جردقة مافي !!

   كسره اولي… اها اليومين ديل العساكر شغالين كل ساعة يطلعو وكلائهم في الاعلام عشان يرفضو التسوية.. وشكلهم  شغالين بخطة عمك حسين مع مصلح  اليماني سيد الدكان في الحكاية اعلاه مع ناس قحت … وبعد شوية حانسمع بقحت اشترت شوال الجردقة 😂😂التسوية. والعساكر حايقنعوهم انو التسوية دي لو ما ظابطة ما كان الكيزان واذنابهم طلعو في الاعلام رافضنها … وقحت حاتشتري التسوية شوال الجردقة والعساكر حايفكو فلستهم  زنقتهم وقحت لمن القيامة تقوم حاتظل حارسة شوال جردقتها تسويتها دي وما حاتلقي ليها زبون يشتريها منها …
  
كسرة تانية: عاد نسوي شنو !! دا الله ودي حكمتو…  الله ابتلانا  بعساكر بفهمو لعبة السياسة.. وسياسيين ما بفهمو لعب العساكر..

..الله في…