شكرًا لكل الاغبياء

✍️صبري محمد علي العيكوره
🌐
وفي ما كتبنا سابقا الى البرهان ان حوار الآلية الثلاثية ما هو الا استدراج للقوات المسلحة وقلنا ان الحوار ماهو الا اطاله لامد معاناة المواطن المسكين وقلنا ان (فولكر) جاءكم مرسلا وان حمدوك هو الشيطان الاكبر وقلنا ان هيبة الجيش ستصبح على المحك ان ظل البرهان (يباري) صعاليك قحت من قاعة الى قاعة ومن منزل سفير الى منزل سفير آخر وصرخنا (عوووووك) الحقوا الوطن فالاستهداف والتدخل اصبح فى رابعة النهار و قلنا ان (فولكر) اصبح هو حاكمنا الفعلى يعطى من يشاء ويمنع من يشاء يمنح شهادات الوطنية و لقب القوى الفاعلة ويجعل من يشاء خاملا عقيما ويمنع ذاك و كثيرا ما تساءلنا
(البلد دى ما فيها رجال)؟
الان لن احدثك عزيزي القارئ عن خطاب البرهان الاخير فذاك امر قد كتبنا عنه بالامس الاول كما الاخرين ولا عن إعفاء المدنيين من مجلس السيادة و لا عن الولاة العسكريون الذين سيكلفون قريبا بل ساسأل سؤال لكل مخموم ومغفل وناعق وناهق ل(فولكر) فى سابق الايام والسؤال هو واضعه بين قوسين …
(لماذا الغى فولكر حوار الالية الثلاثية بعد خطاب البرهان) ؟
فهذا السؤال هو ما يجب ان يعيد نصف العقل المسروق من كل سودانى كان مخدوعا ومخموما بما يسمي المجتمع الدولي و اليونيتاميس وفولكر وكل الذين تمسحوا بباب مقر الامم المتحدة من الشيوعيين واليسار عموما و كل الذين ولغوا فى ماعون فولكر (النجس) ونجاسة الكلاب تستوجب الغسل بالماء والتراب .
لماذا ؟
لماذا ؟
(فجأتن كده) الحاج فولكر قال ليكم ياقحاتة يا حلوين (شطبنا ياجماعة وتم الغاء الحوار) ؟ نعم الغاء (عديل) وليس تاجيلا ؟ ليه كده ياحاج
لانو (يامغفلين) …
حوار الالية ماهو الا استدراج للجيش للتدخل فى شؤونة وصولا الى تفكيكة بالكلية
وعندما خرج الجيش (تانى لزوم الالية شنو و فار العجين شنو؟)
فولكر (كب الزوغة) ليه و سعادة الفريق البرهان اطال الله فى عمره وابقاه ذخرا للسودان
(اااي نكتبها فوق نفس القحاتة والعملاء كده بس)
لماذا يلغيه والفريق البرهان يقول خرجنا من الحوار لنفسح المجال للقوى السياسية للتوافق على تكوين حكومة كفاءات ! طيب عاوز شنو احلى من كده يا حاج (فولكر) ؟
ما طواااالى تجيب اربعة طويلة بتاعتك دى تحكمنا ! متراجع ليه ايها (النازى البغيض) ! طرشقت صاح؟ كل المخطط الغربي راح شمار فى مرقة صاح؟
دعنا نتفاءل قليلا ولنقول ان القوى السياسية ستتوافق (مثلا مثلا) يعنى .

و ده بحسب الشايفو انا غايتو ما اظن يحصل طالما بيننا اقصائيون وعنصريون وشماسة سياسة وطفيلية موائد و ارزقية سفارات وجماعة كده قالوا هم ورثة السودان ده (كلوكولو) ومش عارف عمامات وانصار وجماعة اصصصلا لم يروا لسماء السودان شمسا ولا زمهريرا .

هذا الكوكيل صدقونى لن يتفق ب(فولكر) و لا بخلاف (فولكر) . واغلب ظنى ان (الحاج) لقى الشغلانة وسعت واهل المصلحة الحقيقية اتلموا قبل ايام فى ام ضوا بان ومش عارف ناس الشرق جايين وناس الوسط (التوم هجو شوف ليك شغله غايتو) وناس الشمال جايين الناس ديل كووولهم حا يجوا الخرطوم ماااا حوار وكده ومن حقهم يدلوا برايهم ! اها الحاج هنا نطط عينيهو وقال ياعمك وانا مالى ومال المشاكل فاعلن الغاء الحوار او بالاصح رعاية الالية لحوار السودانيين لان الموضوع (باظ) ولن يحقق ما ارسل من اجله

وبالمرة ياجيران عثمان ميرغني

(اعملوا معروف وتفقدوه فصحته ارث قومة و يجب المحافظة عليها) !!

(طيب) البديل شنو لو لم يتفق السودانيون ؟ البديل(يا عب باسط) هو هذا المسرح الذى يعد الان ….
استلام السلطة بواسطة الجيش وتشكيل حكومة كفاءات غير حزبية (خاااالس) لا تخلو من القوات المسلحة وناس (ديوان جوبا) و اؤكد على هذه الكلمة وقطعا مجلس السيادة سيظل تحت مسمي المجلس الاعلى للقوات المسلحة و سيكون (عسكري صر)

خالى من العمم والشالات .

و بكده ياعسل (already) بتكون الوثيقة الدستورية لحقت حبوبتى
وناس (قحت) (ون وتوو) لحقوا امات طه والشعب زاااتو بكون زهج وبقى فى رويحتو دي وسيخرج كما خرجت مصر للسيسي مع فارق التوقيت (طبعن)

قبل ما انسي :—
و ياجماعة برضو السودانيين ناس واجب وبفهموا فى الاصول وكده ومن هذا المنطلق (اصبروا لى بعد العيد) اشوف ليكم رقم حساب (بنكك) خاص بالامم المتحدة لمساعدة السيد (فولكر) وموآساته فى مصابه الجلل و العزاء موصول لراعى الخطة الاممية والصهيونية (الضب الكبير) التى طرشقها عليهم سعادة الفريق البرهان !

ام بارح (بالليل كده) ….
وردت اخبار ان (فولكر) متهم بتزوير توقيع ود لبات وبتاع الاتحاد الافريقي
لا و بلا خجلة يصدر بيان منسوب للبعثة يقول ليك معليش ياجماعة الناس ديل خارج السودان ومافى زول شاورهم !
اها يا جماعة الزور تواقيعهم منو ؟ ياربى يكون فولكر؟

احيييييي يا ركبي !

قمنا على اللولوه