كلو فيتامين (سي) يا ابني …!

بقلم/ صبري محمد علي (العيكورة)

(لغاويس) الحزب الشيوعي السوداني (أصصصلو) ما حا يخليها فكلما مادت الأرض تحت ارجلهم إختلقوا سبباً وجسماً آخراً ليعيدوا به حركة التاريخ الى الوراء وكلما لاح في الأفق بصيص أمل أتوا (ببطانيتهم) القاتمة ليحجبوا هذا الضوء .

الحزب الشيوعي كعهدنا به يحب (الفكة) !

قول لى فكة شنو ؟

أقصد (فكة الكلام) يعنى تكرار المعنى الواحد بعُدة الفاظ ، يعني يحاول بشتي السبل ان يتشظى (حلوة يتشظى دى مُش كده بالله)؟ وينتفش حتى يبدو كبيراً وكثيراً في نظر المخمومين

(طيب) أوضح ليك الحكاية دى بصورة أبسط شوية .
مثلا (لمن) تقول لى عثمان ود عبد الباسط واحمد ود عبد الباسط وبخيتة بت عبد الباسط والنور ود عبد الباسط والسُرة بت عبد الباسط والاقرع ود عبد الباسط (إنقلبت بيهم عربية) !

كان ممكن تقول لى ياخ يإختصار (أولاد عبد الباسط إنقلبت بيهم عربية وخلاس) !

بس دى ياها حكاية الحزب الشيوعي مع الساحة السياسية (جنس رجفة وكبكبة وشتيت كلام وجنس بليع ريق ونشاف حلق غايتو) !

أعلن منذ يومين عن تكوين (تحالف قوي التغيير الجذري) قالوا انه تحالف جديد بقيادة تجمع المهنيين والحزب الشيوعي ! طيب يا جماعة ديل ما ياهُون أولاد عبد الباسط زاتهم القلناهم قبل شوية !

لا و إمعاناً في نظرية (الفكة الكلامية) قال ليك إن عشرة أجسام ونقابات و (تانى شنو يا صبري …) ايوه ! ومنظمات سياسية وعمالية وضباط صف وجنود الشرطة المفصولين والمعاشيين و(حاجة إسمها) التحالف الاقتصادي لقوى الثورة و مُش عارف تحالف مزارعي الجزيرة والمناقل والاتحاد النسائي السوداني وميثاق الشهداء والثوار وقداما المحاربين وهيئة محامي دارفور و (حاجة إسمها) جند الوطن للحرية والتغيير قد وقعت على هذا التحالف ! (محن دنيا) شى سمعنا بيهو وشئ موديل السنة دى .

(يطرشنا) !

(طيب) يا صاحبي بالله كل هذه الكيانات مش (ياهم) أولاد عبد الباسط الانقلبت بيهم العربية ؟

مش (كوولهم) شوية الشيوعيين فقط قد تم (تشتيتهم) ؟

ويا سلام على إستخدام مفردات الجمع لدى الشيوعيين ياخى بارعين في (التقانة دي بشكل) ! قوي ولجان ومش عارف ملوك إشتباك وثوار ! يعنى كلمة تدل على مفرد (ساااي) مافى .

و (الذ حاجة) الجماعة ديل باصين بشيلنهم بالشفيع خضر ومحمد مختار بتاعهم !

وطبعاً خلال اعلان هذا الكيان كلام (كتيييير) باعو ليهم السيد الخطيب في تلك الاحتفائية المضحكة بتاعت (أولاد عبد الباسط) لم يترك شيئاً عن الديمقراطية وإصلاح الاقتصاد وحقوق المواطنة ومهنية الجيش والحريات !
أهااا يا (شيخنا) ما كنتو ماسكنها تلاااتة سنوات الكلام الحلو ده كان وين ؟
يا خوي بطلوا اللف والدوران كلللكم شيوعيين والكلام ده ما بمشي علينا تاني والبضاعة دي غايتو الا تمشوا تعيدو تغليفها وأقلاها … أقلاها ثلاثين سنة وبعدين تعالوا اعرضوها !

ياخى البضاعة دى في بلدا بارت وانتو لسه ماسكين لى فى عملة منتهية الصلاحية عاوزين تشتروا بيها؟ ياخى بلا (تجم) بلا بطيخ كلكم (فيتامين سي) .

والقصة نرويها منذ أواسط ثمانينيات القرن الماضي والمكان هو جامعة الإسكندرية والراوي والشاهد هو صديقنا الدكتور احمد عثمان حسن رزق رئيس جامعة الرازي .
و دكتور رزق يقول أن زميله الدكتور حسين جعفر الحفيان كان قد طلب عصيرا من كافتيريا الكلية والنادل (المسن) أخطأ الطلب فأتى بالفراولة بدلاً عن البرتقال !
وطالب العصير (الحفيان) متذمراً يُوضح للنادل خطأه والنادل الطيب يقول في هدوء للطالب

(ما هوو كٌلو فيتامين سي يابني) !

وما نقوله للسيد مختار الخطيب و الدكتور الشفيع خضر هو ما قاله النادل لدكتور الحفيان (ما كلو فيتامين سي الشيوعي يابني) .

قبل ما أنسي :
إن كنت تحدث الناس فضع نسبة لذكاء المستمع !
(فاهمني يا سطى) ؟

الثلاثاء ٢٦/ يوليو٢٠٢٢م