البرهان ” مسك الجماعة ضنب الككو ” …

د. أحمدمنصورالمحامي

️

ألم أقل لكم البرهان ده راجل داهية … ألم أقل لكم الزول ده من الرؤساء النجاض … خطابه كان مفاجأة وعجيب غير حسابات الجماعة كلهم وأربك باكاتهم … والدليل علي ذلك تعقيبات القحاتة التي أخرجوها عقب خطاب البرهان جاءت كلها باهتة ومتعارضة ومتضاربة وأي خطاب شايت براهو وبه تعارضات عجيبة جدا جدا لبعضهم البعض … حتي فولكر (الحمبريطي) أب عيونا خضر طارت ليهو وقدر ما يكمل قزازة ويسكي يجيب التانية وماعارف يعمل شنو ؟ عارفين ليه ؟ لأن فولكر أرسل للسودان ومن قبل السودان لدول كل نزاعاتها بين المكون العسكرى والمكون المدني والآن صار النزاع بين المكون المدني والمكون المدني … أما الذي يحمله فولكر ويتأبطة فقد راح في الكازوزة لأن القطر خرج من قضيب السكة حديد وغير مساره وأصبح يمشي في الأرض من غير قضيب السكة حديد … وبمعني واضح كده ومن الآخر أمور فولكر كلها جاطت واتلخبطت بعد خطاب البرهان الأخير ده وراح ليهو الدرب في الموية وبقي يقول المكون العسكري جزء أصيل في الحوار الثلاثي لا يمكن أن يبتعد … يعني فولكر ح يقعد تاني مع مواطنين فقط وما ح يقعد في حواره مع عساكر …
علي العموم كونه يحدث وفاق بين المدنيين طبعا دي حاجة من المستحيلات … إذن لم تتبقي حينها إلا ذات الشوكة التي تكرهون وهي الإنتخابات يا بني قحطوط … قلت ليكم البرهان ده داهية وموية من تحت تبن قلتو لأ … أها بعد ده رأيكم شنو …
  ….