(إي إي … قول طبّال يابااا) ..!

بقلم/ صبري محمد علي (العيكورة)

(اللياقة) و العباطة البسوا فيها القحاتة اصصلوا ما حا يخلوها ! قول لى الحصل شنو ؟
أقول ليك أنا …

بالأمس (عملوا) ورشة بدار المحاميين (قال ليك) لتقييم تجربة الانتقال الديمقراطي وحسب الصورة المصاحبة للخبر (الشافتا عيني دي) كان خمسين نفر او زيادة بمن فيهم خواجاتهم وسفير عربي و الجماعة الواقفين خلف الكاميرا لزوم التوثيق وكده .

الورشة (يا سيدي) نظمتها قوي الحرية والتغيير وصحيفة الديمقراطي !
الحرية والتغيير ياتا فيهن؟ الميثاق واللا المركزي ؟
علمي علمك واحد .

صديقنا الصحفي حسين ملاسي كتب بصفحته على (الفيسبوك) قبل يومين قال بإمكانه حضور هذه الورشة ولكن ليس قبل ان يعرف من هو ممول صحيفة الديمقراطي !
لى شنو ياحسين؟
وقاصد شنو يا حسين ؟
وفى شنو يا سحس؟
يرضيك يخليك حااالف ما يكلمنا .

(طيب ده ما موضوعنا)

المهم نشوف القحاته (العسل) ديل عاوزين يقيمو شنو و يخلو شنو فى ورشتهم الفلته دى ؟

أرجع لموضوع (اللياقة) مرة تانية وعشان ما تقرأوها بمعني (اللياقة البدنية) وكده ! لا يا جماعة المقصود بها

(لايوق الويكة الجدييييدة)

الكل ما تحاول تغسل منها يدك ما بتطلع بسهولة !
(فهمتو يا جماعة) ؟

بالضبط دى حكاية القحاته فبقدر ما الشعب يحاول غسل يديه منهم ما في فايده

يعنى رجااالة حسنة كده حا نحكمكم حا نحكمكم !

عشان كده كل مرة لامين ليهم (شوية) خواجات و مصدعين روسنا بالمجتمع الدولي قال والترويكا قالت !

(لا) واللذيذة فى هذه الورشة قال ليك …

وتم تقديم (عدد) من أوراق العمل ناقشها (عدد) من الخبراء وقادة الحكومة السابقة ! وخلى بالك من كلمة (عدد) هذه يكررونها ليخفوا خلفها قلتهم وهوانهم على الناس ! وهذه ما يعرف (بالكلام الفكة) يعنى بدل توصل المعنى فى كلمتين توصله فى عشرين كلمة والمعنى واحد

التقييم يا (اسطي) عادة تقوم به مراكز متخصصه و محايدة وتنشره في شكل نشرات دورية ويظل مجرد رأي يؤخذ به او لا . اما حكاية
(دلّاكتا شكارتا)
دى ما بتمشي علينا نحن ..!

فاهمني يا (عب باسط)؟

كدى تعالوا نمسكا واحده واحده ونسألكم قيمتو شنو؟

الملف الداخلي مثلا (في عهدكم البائد طبعاً) واللا معيشة الناس و اللا غياب العدل وذبح القانون و اللا العواسة السويتوها في كل مناحى الحياة ! واللا تكونوا ناقشتوا علاقاتنا الخارجية يا ربي؟ و اللا اعتذرتوا عن السفح واللفح الذى ما رسته لجنة (أين يا وجدي) ؟

ياخ استحوا على دمكم وبطلوا ضحك على ذقون الناس الذى ظللتم تمارسونه .
يا سلام على برودكم و تقالة دمكم ياخ …

كلما (أخذتم شلوت) تهيأتم للآخر

اليس لديكم كرامة سياسية؟
ياخ بلاش سياسية
(دم سااكت) ما عندكم ؟

طيب أنا حا أريحكم (خااالس) من موضوع التقييم ده و من حكاية القومة والقعدة دى وأقيم ليكم فترتكم الانتقالية(إتفقنا)؟

وعشان ما يجينى واحد مخموم ناطى و يقول لي
(كاااااك وبتاع) ….

هاكم القليل جدا البتذكرو من سجمكم و رمادكم في الفترة الانتقالية
(لانه لو ركزنا فى الموضوع ده حا تنجلطوا) : —

(الرغيفي) الرغيفة االواحده دى كانت بى كم و بقيتوها بى كم ؟ المحروقات (غتستو حجرا) إنعدام الادوية ، إغلاق المستشفيات ، إنفراط الامن ، التشفي والقلع ، تسيس العدالة ، السجن بلا تهم وبلا محاكمة ، الفصل التعسفي !

(المويى) الموية الزقاء دى بقت فى تلتله والكهرباء وصحة البيئة ! بيئة شنو ياخ هى صحة المستشفيات زاتا وينا؟

ده غير التدمير الممنهج للبنية التحتية كالطرق و الإشارات الضوئية ياخ حتى (الانترلوك) ده (طلعتو روحو)

شيلك ختك .. شيلك خُتك .

اما السياسية الخارجية والدكتورة مريم ف (ده) كلام تاني فالمنصورة دخلت بسد النهضة وخرجت بسد النهضة يعنى دخلت بخوجلي وطلعت بحمد كما يقال .

(لا لا أستنى معاى) ياخي ….

و كفاءتكم كمان بسم الله ماشاء الله تسد عين الشمس ناس مدني جرادل و(الولد) سلك وبتاع التربية والتعليم (داك) و(مستر) القراي و (مسز) هبة و فكي منقة وعبد البارئ و نصر الدين والمؤسس حمدوك والقائمة تطول من الفشل المتناسل !
ياخ كنتو مبدعين بحق وحقيقة أعدتمونا للعصر الحجري في ثلاثة سنوات كاسرع تقهقر يعرفه التاريخ .

ده غير تطاولكم على الدين وثوابت الامة فتلك قصة أخري (تقيموا شنو ياخي)؟

تقيموا خيبتكم وفشلكم يا قبيلة من الفاشلين !

ده غير ملف (الكضب) ف (ده) حاجة تانية (خااالس) عاوز ليه لورى هينو (٧٠) طن مننن جاتك كفاءآت يا وطن لغاية مليارات ماليزيا مروراً ب (حانبنيهو البنحلم بيهو) ولغاااية (لو ما استلمنا البلد دى حا تقطع الكهرباء والموية يوماااتى ولغاااية حتى حتى لا تصبح الرغيفة بجنية ولغاااية حتى لا يصل الدولار شارع الستين !

بالمناسبة يا حلوين الدولار اليوم وصل ياتو شارع ؟

فترتكم كانت كاريثية يا سادتي بمعنى الكلمة ياخ الناس تموت داخل السجون وفى الطرقات وخلف اسوار المستشفيات . جحافل من الجوعي على أبواب المطاعم والصيدليات يتكففون اللقمة وثمن وصفة الدواء !
(تقيمو شنو ياخ)؟

قبل ما أنسي : ـــ
و الضابط العراقي على الحدود العراقية السورية ذات يوم يتفحص فرقة غنائية قادمة لبغداد بادواتها ويسأل كل عن مهنته فيجيبون عازف ، صفارة ، كمنجة !
واحدهم كان ضخم الجثة فى كامل هندامة على وجهه نظارة سوداء
اجاب على السؤال بانه (ضابط)!
وضابط الحدود يعيد السؤال

ضابط شنهو يابااااا ؟

والرجل يعيد ذات الاجابة (ضابط) !

وضابط الحدود يعيد السؤال
إي إي دريت إنك ضابط بس ضابط شنهوو مخابرات ، جيش مباحث ، شنهوو يابا ؟

والرجل يقول (ضابط ايقاع)

وضابط الحدود و هو يغلق الجواز و يعيده اليه …
يقول ….
(إي .. إي أوول طبًال ياباااا) !

واذا وجهنا ذات السؤال لجماعة الورشة لما ظفرنا بغير هذه الاجابة
إي إي إي (قول طبًال يابا) …!!

الخميس ٢١/ يوليو ٢٠٢٢م